လောကမှာ အရေးကြီးဆုံး လူ

လောကမှာ အရေးကြီးဆုံးလူဟာ ဘယ်သူ ဖြစ်မလည်း။ စာဖတ်သူအနေနဲ့ ဒီမေးခွန်းနဲ့ ပတ်သက်လို့ စိတ်ထဲမှာ ပြေးလွှားသွားတဲ့ နာမည်တွေ ရှိပါလိမ့်မယ်။ စာရေးသူအတွက်က လောကမှာ အရေးကြီးဆုံးဟာ မိမိကိုယ်တိုင်ပါပဲ။

ဘာကြောင့် မိမိကိုယ်တိုင်ဟာ အရေးကြီးဆုံး ဖြစ်ရသလဲ။

မိမိကိုယ်မိမိ အရေးကြီးတဲ့ လူ အဖြစ် မြင်ယောင်ကြည့်လိုက်ရအောင်။ မိမိဟာ တကယ်တမ်း အရေးကြီးတဲ့လူ ဖြစ်သွားတဲ့အခါ၊ တန်ဖိုးထားရဆုံး လူ ဖြစ်သွားတဲ့အခါ မိမိရဲ့ ပစ္စုပ္ပန်၊ အနာဂတ် ကောင်းရာကောင်းကျိုးအတွက် မိမိဟာ တတ်နိုင်သလောက် ကြိုးစားတော့မယ်။ ဒီနေရာမှာ အရေးကြီးဆုံးဆိုတာဟာ အများတကာကို နင်းချေပြီး အခွင့်အရေး ရလိုတဲ့ အတ္တဆန်ဆန် အရေးကြီးဆုံးကို ပြောတာ မဟုတ်ပဲ ကောင်းမှုအပေါင်းတို့ မိမိထံက စတင် စီးဆင်းဖို့ မိမိဟာ အရေးကြီးဆုံး ဖြစ်တယ်လို့ ခံယူရမှာကို ဆိုလိုတာ ဖြစ်ပါတယ်။

အရေးကြီးဆုံး မိမိအတွက် ငယ်စဉ်အခါမှာ ပညာကို ကြိုးစားရှာမယ်။
အရေးကြီးဆုံး မိမိအတွက် ပစ္စုပ္ပန်၊ တမလွန်အကျိုးရှိအောင် ပြုမူ၊ ပြောဆို နေထိုင်မယ်။ တွေးတောမယ်။
အရေးကြီးဆုံး မိမိရဲ့ မိဘများကို ဂရုတစိုက် စောင့်ရှောက်မယ်။
အရေးကြီးဆုံး မိမိနေထိုင်ရာ လောကကို အလှဆင်မယ်။
အရေးကြီးဆုံး မိမိဘ၀အတွက် အချိန်တိုင်းကို အကျိုးရှိရှိ အသုံးချမယ်။
အရေးကြီးဆုံး မိမိရဲ့ ကျန်းမာရေးအတွက် အရက်သေစာ သောက်စားခြင်း၊ အပျော်အပါး လိုက်စားခြင်းကို ရှောင်ကြဉ်မယ်။
အရေးကြီးဆုံး မိမိရဲ့ ကိုးကွယ်ယုံကြည်ရာအတိုင်း ပြုမူနေထိုင်မယ်။
အရေးကြီးဆုံး မိမိကနေ ပြဿနာတွေ စတင်မဖြစ်ပွားအောင် နေထိုင်မယ်။
အရေးကြီးဆုံး မိမိရဲ့ စိတ်ဓာတ်လေးကို ဖြူစင်အောင် ထားမယ်။
ဘယ်သူပျက်ပျက် မိမိသာ အရေးကြီးဆုံးမို့ ကိုယ်မပျက်အောင် နေမယ်။

.....
.....
..... စသည်ဖြင့် မိမိကိုယ်ကို တန်ဖိုးထားတဲ့အခါ သင့်အနေနဲ့ တန်ဖိုးရှိတဲ့ လူတစ်ယောက်ဖြစ်အောင် နေထိုင်ပါလိမ့်မယ်။ သင်ဟာ ဒီလိုနည်းနဲ့ သင့်ကိုယ်တိုင် အရေးကြီးဆုံး ဖြစ်လာရုံမျှမက သင့်ပတ်ဝန်းကျင်ကိုလည်း သင်နဲ့အတူ ကောင်းမှုတွေ စတင်စီးဆင်းရာ အရေးကြီးဆုံး လူများအဖြစ် ပြောင်းလဲပေးလာနိုင်ပါလိမ့်မယ်။

တကယ်တော့ လောကီ ကာမဂုဏ် အာရုံတွေကို ချစ်မြတ်နိုးတာကို တစ်ချို့က မိမိကိုယ်မိမိ ချစ်မြတ်နိုးလို့ လုပ်နေတဲ့အရာတွေလို့ မှားယွင်းစွာ တွေးတောပြုမူတတ်ကြပါတယ်။ ဒါဟာ မိမိကိုယ် မိမိ ချစ်မြတ်နိုးခြင်း မဟုတ်ပါဘူး။

မိမိကိုယ်မိမိ ချစ်မြတ်နိုးတဲ့လူ၊ မိမိကိုယ်မိမိ အရေးကြီးဆုံးလို့ မှတ်ယူတဲ့လူဟာ မိမိရဲ့ ကျန်းမာရေး၊ လူမှုရေး၊ စီးပွားရေး ပျက်စီးစေမယ့် အတွေး၊ အပြော၊ အပြုအမူ မှန်သမျှကို ဆန့်ကျင်ရမယ် မဟုတ်လား ခင်ဗျာ။

Download Wun Zinn